La storia dei Cimbri è sempre stata una storia di confine, di frontiera sicuramente fino alla prima guerra mondiale: negli ultimi cent’anni di barriere ne sono cadute molte, Luserna è stata conosciuta e riconosciuta diventando una meta di turismo sia a livello culturale, linguistico che paesaggistico. Per questo vogliamo raccontarvi una storia di frontiera attuale, un “Ponte tra Frontiere” oppure, nel suo titolo originale, il progetto “Bridges Between Borders” che ha coinvolto i ragazzi dell’Istituto Comprensivo di Folgaria Lavarone e Luserna in un intreccio interculturale con tre Scuole appartenenti all’Austria, all’Estonia e alla Repubblica Ceca.


Di schual vo Lusérn iz oramai gespèrt vo djardar, ma in di schual vo Lavròu un Folgràit, boda gian ünsarne djunge o, da zimbrische kultùr un zung iz no bichte, tånto ke sa khemmen studjàrt in alle di klassi. Pròprio vor üs zimbarn dar Istituto Comprensivo hatt augerichtet disan projèkht boda bill gian zo khenna un zo darvéra alle di particolarità vodar kultùr, zung vo viar lentar von Beleschlånt, Österraich, Estonia un Tschekài.
Disar projèkht iz ågeheft vert, pitt kontàkte von djungen pitt internet, zoa zo khennase pezzar un zo khemma tschell. Alle di klassi von 10 fin 15 djar håm partecipàrt un alle di djunge soin gest kontént un entusiasti zo darvéra naüge lentar. Di profesör håm pensàrt zo divìdra in gåntz projèkht in mearare toaln zoa zo stimolara di studéntn, di zil soin: khennen di usi un kostùmi vo alln un pensàrn an lògo; darvérn di musìk un di strumenti musicali vo dise lentar; süachan di ricette un machan an khlumman ricettario un an kalandàrdjo; lirnen a pizzle alle di zungen un machan an khlumman vocabolario.
Zo macha ditza alle di schualn håm gearbatet sèlbart un dena håmsa gemacht vil viazi zoa zo giana zo khenna di åndarn. In djenàro 2016 soinsase bokhént alle in Österraich, dena in madjo in Estonia, in ditzémbre in di Tschekài un est, in fevràro, soinsa khent alle da aft ünsar hoachebene zoa zo khenna ünsar zimbar earde.
Alle dise studéntn, pinn profesör soin gestånt von menta 20 von fevràro fin attn sunta drau un, in disa boch soinsa gånt ummar atz Folgràit, Lavròu un Lusérn. An earstn håmsa gemacht laboratori pitt musìk zoa zo lirna alle an uantzega kantzù, boda anìaglana strofa iz khent gesunk in a zung un dar ritornello iz gest in inglese, da bèltzung boda oramai alle di djunge khennen gerècht; dena håmsa gemacht vil sport attn snea un ka Tria in di palestra zo krabla.
An tage soinsa gånt atz Folgràit zo höara da ünsar stòrdja in di djardar von Groaz Bèlt Kriage un zo macha a “caccia al tesoro”.
In lest tage di djungen soin khent atz Lusérn o: sa håm gesek in Dokumentationszentrum, ’z Haus von Prükk, gemacht ’z staigele “nå in tritt von Sambinélo” un provàrt zo khnöppla pinn baibar vodar Khnöpplschual vo Lusérn. Dena, an lestn håmsa gesek se o in Martzo boda hatt vorprennt.
Disa avventura iz gest schümma vor di djungen un vor di profesör o, boda håm apprezzàrt ünsar hoachebene, ünsar kultùr un ünsar zung. Sichar ditza bill soin an originàl un ambiziósatar projèkht boda bill lazzan khennen fra se, di djungen un intånto darvérn di stòrdja, di traditzióng un di kultùr vo dise lentar.
Speràrbar ke, azpe disan, bartnda khemmen gemacht vil åndre schümmane projèkhte boda machan khennen un stian in kompagnìa di khindar un di djunge.


Daniel von Polèz